OpenStreetMap

漢字版

中國遐有人寫日記哼(hainn)有大量學生佇中南大學畫地圖,看起來是老師按學生畫學校附近,但是缺少 QA 的程序,予袂少有問題的資料無人插。這是早慢欲面對的問題,社群愛動員去修理,抑是畫甲傷䆀做理由攏刣刣掉矣。嘛會使揣 Data Working Group 協助,共講袂聽的口座封一寡時間,予社群成員有時間清理佮修正。

臺灣遮的經驗是,共一寡看起來是學生做學校指定作業的口座溝通,用變更集留話,通常是無回應的。對社群來講有時間就直接修改好勢,閣來研究𪜶是對佗位來的。無想欲改就攏總刣掉嘛無要緊,必要時予 Data Working Group 處理,處理無回應閣繼續編織的口座,至少無予問題擴大。

會記得臺灣遮上嚴重的底代是美光團,用 HOT Task Manager 佇咧畫彰化,雲林遐的建築,最後因為問題建築傷濟矣,無法度修改好勢,予 Data Working Group 資料攏刣刣掉。

其他的代猶閣有彰化遐學校學生的編輯團,一直毋知是佗位的學校咧畫。猶有人加上心理醫療場所的POI,嘛是有一寡問題,因為應該是共地址用 Google 轉成經維度,資料的授權有淡薄仔問題。

OSM Wiki有組織編輯指引,有團體愛編輯,著愛登記佇 Wiki 頁面,愛留𤆬頭的人聯絡資料,目的,佮時間。臺灣環境資訊協會的啉水地圖計畫就有留資料登記。組織編輯指引應該是 OpenStreetMap 生態系內底,會當參考佮遵守的指引,嘛會當參考別人是按怎處理的。

上好是揣著頭,共老師好好矣溝通,老師愛知影 OpenStreetMap 予袂少重要的網站使用,學生貢獻是愛頂真,袂使清彩處理。通常予學生畫較簡單的事物,親像講學校,徛家附近的店家,莫予學生畫傷複雜,傷大的範圍。

又閣有中國的環境無允准一般人來畫地圖,個人畫地圖是違反𪜶的法律。愛揣到頭人佇Orgaizated Editing Guideline頁面登記,感覺毋是傷好的處理方式。另外學生個人號口座用真實姓名抑是問題。佇中國的網路環境,線頂的口座號一个代號較好,莫用真實姓名號口座的名號是較好的做法。

Tâi-lô-pán

Tiong-kok hiah ū-lâng siā ji̍t-kì hainn ū tuā-liōng ha̍k-sing tī Tiong-lâm Tāi-ha̍k uē tuē-tôo, khuànn-khí-lâi sī lāu-su àn ha̍k-sing uē ha̍k-hāu hù-kūn. Tse-sī siā-kûn tsá-bān bueh bīn-tuì ê būn-tê, siā-kûn ài tóng-guân khì siu-lí, ia̍h-sī uē kah siunn-bái tsuè-lí-iû lóng thài-thài-tiāu ah. Mā ē-sái tshē Data Working Group hia̍p-tsōo, kā kóng-buē-thiann ê kháu-tsō hong tsi̍t-kuá sî-kan, hōo siā-kûn sîng-guân ū sî-kan tshing-lí kah siu-tsìng.

Tâi-uân tsia ê king-giām sī, kā tsi̍t-kuá khuànn-khí-lâi sī ha̍k-sing tsuè ha̍k-hāu tsí-tīng tsok-gia̍p ê kháu-tsō kau-thong, iōng piàn-king-tsi̍p liû-uē, thong-siông sī bô huê-ìng ê. Ū-sî-kan tō ti̍t-tsiap siu-kái hó-sè, koh-lâi gián-kiù in tuì tó-uī lâi ê. Bô siūnn bueh kái tō lóng thâi-tiāu mā bô iàu-kín, pit-iàu sī hōo Data Working Group tshú-lí, tshú-lí bô huê-ìng koh kè-sio̍k pian-tsi̍p ê kháu-tsō, tsì-tsió bô hōo būn-tê khok-tāi.

Ē-kì-tit Tâi-uân tsia siōng-giâm-tiōng ê tāi sī Bí-kong-thuân, iōng HOT Task Mager tī-teh uē Tsiong-huà, Hûn-lîm tsia-ê kiàn-tio̍k, tsuè-āu in-uī būn-tê kiàn-tio̍k siūnn-tsuē ah, bô-huat-tōo siu-kái hó-sè, hōo Data Working Group tsu-liāu lóng thâi-thâi-tiāu.

Kî-thá ê tāi-tsì iáu-koh-ū Tsiong-huà hia ha̍k-hāu ha̍k-sing ê pian-tsit-thuân, it-ti̍t m̄-tsai sī tuì tó-uī lâi ê ha̍k-hāu teh uē. Iáu-ū-lâng ka-siōng tsuân Tâi-uân ê sim-lí i-liâu tiûnn-sóo ê, m̄-sī ū-būn-tê, in-uī ing-kai sī kā tuē-tsí iōng Google tuē-tôo tsuân-sîng kíng-uī-tōo, tsu-liāu ê siū-khuân ū tām-po̍h-á būn-tê.

OSM Wiki ū tsoo-tsit pian-tsi̍p tsí-ín ê ia̍h-bīn, ū thuân-thé ài pian-tsi̍p tsìn-tsîng, tō ài tīng-kî tī Wiki ia̍h-bīn, ài lâu tshuā-thâu ê lâng liân-lo̍k tsu-liāu, bo̍k-tik, kah sî-kan. Tâi-uân Khuân-kíng Tsū-sìn Hia̍p-huē ê Lim-tsuí Tuē-tôo Kè-uē tō-ū lâu tsu-liāu tīng-kî. Tsoo-tsit pian-tsi̍p tsí-ín ing-kai sī OpenStreetMap sing-thài-hē lāi-tué, ē-tàng tsham-khó kah tsun-siú ê tsí-ín, mā ē-tàng tsham-khó pa̍t-lâng sī án-tsuánn tshú-lí ê.

Siōng-hó sī tshē-tio̍h thâu, lāu-su ài tsai-iánn buē-tsio tiōng-iàu ê bāng-tsām sú-iōng, ha̍k-sing kòng-hiàn ài tíng-tsin, buē-sái tshìng-tshái tshú-lí, thong-siông ài hōo ha̍k-sing uē khah kán-tan ê mngh-kái, tshin-tshiūnn kóng ha̍k-hāu, khiā-ke hù-kūn ê tiàm-ke, mài-hōo ha̍k-sing uē siūnn ho̍k-tsa̍p, siūnn tuā ê huān-uî.

Iū-koh ū Tiong-kok ê khuân-kíng bô-ún-tsún it-puann-lâng lâi uē tuē-tôo, kò-jîn uē tuē-tôo sī uî-huán in-ê huat-lu̍t. ài tshē kàu thâu-lâng tī Organized Editing ia̍h-bīn tīng-kî, kám-kak m̄-sī siūnn-hó ê tshú-lí hong-sik. Līng-guā ha̍k-sing kò-jîn hō kháu-tsō īng tsin-si̍t sìnn-miâ ia̍h-sī būn-tê. tī Tiong-kok ê bāng-lōo khuân-kíng, suànn-tíng ê kháu-tsō hō tsi̍t-ê tāi-hō khah-hó, mài-iōng tsin-si̍t sìnn-miâ hō kháu-tsō ê miâ-hō sī khah-hó ê tsuè-huat.

Pe̍h-ōe-jī pán-pún

Tiong-kok hiah ū-lâng siā ji̍t-kì haiⁿ ū tōa-liōng ha̍k-seng tī Tiong-lâm Tāi-ha̍k ōe tōe-tô͘, khòaⁿ-khí-lâi sī lāu-su àn ha̍k-seng ōe ha̍k-hāu hù-kūn. Che-sī siā-kûn chá-bān boeh bīn-tùi ê būn-tê, siā-kûn ài tóng-goân khì siu-lí, ia̍h-sī ōe kah siuⁿ-bái chòe-lí-iû lóng thài-thài-tiāu ah. Mā ē-sái chhē Data Working Group hia̍p-chō͘, kā kóng-bōe-thiaⁿ ê kháu-chō hong chi̍t-kóa sî-kan, hō͘ siā-kûn sêng-goân ū sî-kan chheng-lí kah siu-chèng.

Tâi-oân chia ê keng-giām sī, kā chi̍t-kóa khòaⁿ-khí-lâi sī ha̍k-seng chòe ha̍k-hāu chí-tēng chok-gia̍p ê kháu-chō kau-thong, iōng piàn-keng-chi̍p liû-ōe, thong-siông sī bô hôe-èng ê. Ū-sî-kan tō ti̍t-chiap siu-kái hó-sè, koh-lâi gián-kiù in tùi tó-ūi lâi ê. Bô siūⁿ boeh kái tō lóng thâi-tiāu mā bô iàu-kín, pit-iàu sī hō͘ Data Working Group chhú-lí, chhú-lí bô hôe-èng koh kè-sio̍k pian-chi̍p ê kháu-chō, chì-chió bô hō͘ būn-tê khok-tāi.

Ē-kì-tit Tâi-oân chia siōng-giâm-tiōng ê tāi sī Bí-kong-thoân, iōng HOT Task Mager tī-teh ōe Chiong-hòa, Hûn-lîm chia-ê kiàn-tio̍k, chòe-āu in-ūi būn-tê kiàn-tio̍k siūⁿ-chōe ah, bô-hoat-tō͘ siu-kái hó-sè, hō͘ Data Working Group chu-liāu lóng thâi-thâi-tiāu.

Kî-thá ê tāi-chì iáu-koh-ū Chiong-hòa hia ha̍k-hāu ha̍k-seng ê pian-chit-thoân, it-ti̍t m̄-chai sī tùi tó-ūi lâi ê ha̍k-hāu teh ōe. Iáu-ū-lâng ka-siōng choân Tâi-oân ê sim-lí i-liâu tiûⁿ-só͘ ê, m̄-sī ū-būn-tê, in-ūi eng-kai sī kā tōe-chí iōng Google tōe-tô͘ choân-sêng kéng-ūi-tō͘, chu-liāu ê siū-khoân ū tām-po̍h-á būn-tê.

OSM Wiki ū cho͘-chit pian-chi̍p chí-ín ê ia̍h-bīn, ū thoân-thé ài pian-chi̍p chìn-chêng, tō ài tēng-kî tī Wiki ia̍h-bīn, ài lâu chhōa-thâu ê lâng liân-lo̍k chu-liāu, bo̍k-tek, kah sî-kan. Tâi-oân Khoân-kéng Chū-sìn Hia̍p-hōe ê Lim-chúi Tōe-tô͘ Kè-ōe tō-ū lâu chu-liāu tēng-kî. Cho͘-chit pian-chi̍p chí-ín eng-kai sī OpenStreetMap seng-thài-hē lāi-tóe, ē-tàng chham-khó kah chun-siú ê chí-ín, mā ē-tàng chham-khó pa̍t-lâng sī án-chóaⁿ chhú-lí ê.

Siōng-hó sī chhē-tio̍h thâu, lāu-su ài chai-iáⁿ bōe-chio tiōng-iàu ê bāng-chām sú-iōng, ha̍k-seng kòng-hiàn ài téng-chin, bōe-sái chhèng-chhái chhú-lí, thong-siông ài hō͘ ha̍k-seng ōe khah kán-tan ê mngh-kái, chhin-chhiūⁿ kóng ha̍k-hāu, khiā-ke hù-kūn ê tiàm-ke, mài-hō͘ ha̍k-seng ōe siūⁿ ho̍k-cha̍p, siūⁿ tōa ê hoān-ûi.

Iū-koh ū Tiong-kok ê khoân-kéng bô-ún-chún it-poaⁿ-lâng lâi ōe tōe-tô͘, kò-jîn ōe tōe-tô͘ sī ûi-hoán in-ê hoat-lu̍t. ài chhē kàu thâu-lâng tī Organized Editing ia̍h-bīn tēng-kî, kám-kak m̄-sī siūⁿ-hó ê chhú-lí hong-sek. Lēng-gōa ha̍k-seng kò-jîn hō kháu-chō ēng chin-si̍t sìⁿ-miâ ia̍h-sī būn-tê. tī Tiong-kok ê bāng-lō͘ khoân-kéng, sòaⁿ-téng ê kháu-chō hō chi̍t-ê tāi-hō khah-hó, mài-iōng chin-si̍t sìⁿ-miâ hō kháu-chō ê miâ-hō sī khah-hó ê chòe-hoat.

Location: 后湖小区, 岳麓街道, 岳麓区, 长沙市, 湖南省, 中国

Login to leave a comment